Տեխնիկական նկարագիր

Հիմքը կառուցված է պտուտակավոր հիմնասյուների վրա, որոնք անհրաժեշտ հատվածներում ամրացված են մետաղական անկյունագծային կապերով։ Նման լուծումն ապահովում է կոնստրուկցիայի բարձր տարածական կոշտությունն ու կայունությունը՝ նվազագույնի հասցնելով հնարավոր թրթռումները։
Հիմքի գոտևորումն իրականացված է 195 × 45 մմ չափսի երեք տախտակներից կազմված ամրացված հեծանային փաթեթով։ Օգտագործված փայտանյութը նախապես անցել է հատուկ խցիկային չորացում և մշակվել պաշտպանիչ նյութերով։

Հատակի կրող կառուցվածքը ձևավորվում է 195 × 45 մմ հատույթով բարձրորակ տաշված փայտանյութից, որը նախապես անցել է խցիկային չորացում։ Հեծանների (լագերի) տեղադրման քայլը որոշվում է ինժեներական հաշվարկի հիման վրա՝ հաշվի առնելով նախատեսվող շահագործման ծանրաբեռնվածությունները։ Այս լուծումն ապահովում է հատակի բարձր կոշտություն և կայունություն՝ կանխելով ճկվածքները, տատանումներն ու «բատուտի» էֆեկտը։
Հատակի ջերմամեկուսացումն իրականացվում է ցողման եղանակով կիրառվող պոլիուրեթանային փրփուրի (ՊՊՈՒ) ժամանակակից տեխնոլոգիայով։ Կիրառման արդյունքում ձևավորվում է միաձույլ, անկար և հերմետիկ ջերմամեկուսիչ շերտ, որը ծածկում է կառուցվածքի բոլոր միացումները և դժվարամատչելի հատվածները։ Այն նվազագույնի է հասցնում «ցրտի կամրջակների» առաջացումը, կանխում սառը օդի ներթափանցումը և զգալիորեն բարձրացնում կառույցի ընդհանուր էներգաարդյունավետությունը։
Հատակի կառուցվածքը ներքևի հատվածից պաշտպանված է ամուր մանրաբջիջ մետաղական ցանցով, որը կանխում է կրծողների ներթափանցումը։
Որպես հատակի վերջնական ծածկույթ կիրառվում է «ակոս-ելուստ» միացմամբ պրեմիում դասի տախտակ։ Միացման այս համակարգն ապահովում է տարրերի ճշգրիտ և ամուր կցում՝ ձևավորելով հարթ, կայուն, երկարակյաց և բնական փայտե մակերես։

Տան կրող համակարգը կառուցված է հիբրիդային ուժային հիմնակմախքի սկզբունքով։ Ճակատային լայն պատուհանների հատվածներում, որտեղ հատկապես կարևոր են տարրերի բարձր կրողունակությունը, երկրաչափական կայունությունն ու արտահայտիչ տեսքը, հիմնակմախքը պատրաստվում է բարձրորակ կառուցվածքային սոսնձված չորսուից։
Կառույցի ներքին՝ տեսադաշտից թաքնված հիմնակմախքը հավաքվում է 45 մմ հաստությամբ բարձրորակ տաշված տախտակներից, որոնք նախապես անցել են խցիկային չորացում։ Տան տարածական կոշտությունն ու ընդհանուր կայունությունն ապահովելու նպատակով նախագծով սահմանված հատվածներում տեղադրվում են դասական փայտե անկյունագծային կապեր։ Այլ հատվածներում, կառուցվածքային հաշվարկից ելնելով, կիրառվում է 12 մմ հաստությամբ OSB-3 սալերով պատում։ Երկու լուծումներն էլ ծառայում են հիմնակմախքի ամրացմանը և ընտրվում են՝ կախված տվյալ հատվածի կառուցվածքային առանձնահատկություններից։
Արտաքին պատերը երեսպատվում են բնական փայտից պատրաստված ժամանակակից պլանկենով, որը ճակատին հաղորդում է արտահայտիչ և ներդաշնակ տեսք։
Պատերի ջերմամեկուսացումն իրականացվում է ցողման եղանակով կիրառվող պոլիուրեթանային փրփուրի (ՊՊՈՒ) տեխնոլոգիայով։ Այն ձևավորում է միաձույլ, անկար և հերմետիկ ջերմամեկուսիչ շերտ՝ նվազեցնելով ջերմային կորուստներն ու «ցրտի կամրջակների» առաջացման հավանականությունը։ Արդյունքում ամռանը տան ներսում պահպանվում է հաճելի զովություն, իսկ ձմռանը՝ ջերմություն՝ նպաստելով ջեռուցման և հովացման ծախսերի կրճատմանը։
Միջսենյակային միջնապատերում տեղադրվում է հատուկ ակուստիկ քարաբամբակ, որը նվազեցնում է ձայնի փոխանցումը և ապահովում սենյակների միջև անհրաժեշտ ակուստիկ հարմարավետություն։
Ներքին պատերի հարդարման համար օգտագործվում է բնական փայտից պատրաստված «չորսուի իմիտացիա» երեսպատման տախտակ, որը համատեղում է բնական նյութի էկոլոգիական հատկություններն ու գեղագիտական տեսքը։
Խոհանոցի և սանհանգույցների թաց գոտիներում կիրառվում է այլ կառուցվածքային լուծում․ 12 մմ հաստությամբ ամուր OSB սալերի վրա տեղադրվում է 12 մմ հաստությամբ խոնավակայուն գիպսակարտոն։ Ստացված ամուր և հարթ հիմքը նախատեսված է հետագա սալիկապատման համար։

Առաստաղի հորիզոնական հատվածներում բարձրությունը հասնում է 3 050 մմ-ի, իսկ «երկրորդ լույսով» ենթատանիքային գոտիներում՝ մինչև 4 500 մմ-ի։ Բարձրությունների նման համադրությունը տեսողականորեն ընդլայնում է տարածքը և ինտերիերին հաղորդում թեթևություն ու ազատության զգացողություն։
Առաստաղի կրող կառուցվածքը պատրաստվում է 145 × 45 մմ հատույթով բարձրորակ տաշված տախտակներից, որոնք նախապես անցել են խցիկային չորացում։ Ներքին մակերեսը երեսպատվում է բնական փայտից պատրաստված «չորսուի իմիտացիա» տախտակով՝ ստեղծելով ջերմ և ներդաշնակ միջավայր։
Առաստաղի ջերմամեկուսացումն իրականացվում է պոլիուրեթանային փրփուրի (ՊՊՈՒ) կիրառմամբ։ Ձևավորվող միաձույլ և անկար ջերմամեկուսիչ շերտը նվազագույնի է հասցնում տանիքի միջոցով ջերմային կորուստներն ու նպաստում տան ներսում կայուն ջերմաստիճանի պահպանմանը։
Վերին հատվածում տեղադրվում են OSB սալեր, որոնք ծառայում են որպես ձեղնահարկի սևագիր հատակ։ Այս լուծումն ապահովում է տանիքատակի տարածքի անվտանգ և հարմարավետ հասանելիությունը՝ տեխնիկական զննման ու սպասարկման աշխատանքների իրականացման համար։

Տանիքի կրող հիմնակմախքն ու հեծանային համակարգը կառուցվում են 145 × 45 մմ հատույթով բարձրորակ տաշված տախտակներից։ Օգտագործվող փայտանյութը նախապես անցնում է խցիկային չորացում, ինչի շնորհիվ ապահովվում են տարրերի ճշգրիտ երկրաչափությունը, չափային կայունությունն ու բարձր կրողունակությունը։
Որպես տանիքածածկ կիրառվում է պրեմիում դասի ժամանակակից կլիկֆալցային համակարգ։ Ծածկույթի թաքնված ամրացման եղանակը բացառում է մետաղական մակերևույթի միջանցիկ անցքերը՝ ապահովելով միացումների բարձր հերմետիկություն, հուսալի պաշտպանություն տեղումներից և տանիքածածկի երկարատև շահագործում։
Տանիքածածկի ջրաթափանցելիության և կաթոցների առաջացման բացառման համար տրամադրվում է 15 տարվա երաշխիք, իսկ պատշաճ տեղադրման և շահագործման պայմաններում ծածկույթի ծառայության ժամկետը կարող է գերազանցել 50 տարին։

Շինարարության ընթացքում անթերի կիրառվել են պաշտպանիչ բոլոր ժամանակակից տեխնոլոգիաները։ Ճակատային և տանիքի հատվածներում նախատեսված են օդափոխության բացակներ՝ խոնավության (կոնդենսատի) անարգել հեռացման համար։ Տեղադրված են բարձրորակ գոլորշամեկուսիչ և սուպերդիֆուզիոն հողմապաշտպան թաղանթներ, որոնց բոլոր կցվանքները հերմետիկորեն մշակված են հատուկ ժապավեններով։ Օգտագործվող ողջ փայտանյութն անցնում է I կամ II կարգի հակահրդեհային և հակասնկային (հակապուտային) խորքային մշակում։ Այս ամենը երաշխավորում է կառույցի տասնամյակների կայունությունն ու երկարակեցությունը։ Ուժային կարկասի համար տրամադրում ենք 15 տարվա երաշխիք։

Տան բոլոր պատուհանները պատրաստվում են բարձրորակ և երկարակյաց ալյումինե պրոֆիլներից։ Ալյումինե համակարգերն առանձնանում են բարձր ամրությամբ, եղանակային ազդեցությունների նկատմամբ դիմադրությամբ և երկրաչափական կայունությամբ, ինչը հատկապես կարևոր է մեծ մակերեսով ապակեպատման դեպքում։
Պատուհանները համալրվում են միակխցիկ էներգախնայող ապակեփաթեթներով՝ ցածր էմիսիոն ծածկույթով։ Այն նվազեցնում է ապակու միջոցով ջերմափոխանակությունը․ ամռանը սահմանափակում է արևային ջերմության ներթափանցումն ու տարածքների գերտաքացումը, իսկ ձմռանը՝ ջերմային կորուստները։

Ջրամատակարարման խողովակաշարերի թաքնված մոնտաժն իրականացվում է պատերի և հատակների կառուցվածքների ներսում։ Խողովակները տեղադրվում են հատուկ ջերմամեկուսիչ պատյանների մեջ, որոնք նվազեցնում են ջերմային կորուստները, պաշտպանում խողովակաշարը կոնդենսատի առաջացումից և կանխում ջերմաստիճանային ընդարձակման հետևանքով առաջացող աղմուկը։
Համակարգում կիրառվում են կարված պոլիէթիլենից (PE-X) պատրաստված բարձր ամրության խողովակներ և սահող օղակներով աքսիալ միացումներ։ Ջրամատակարարման համակարգի մոնտաժային աշխատանքների համար տրամադրվում է 5 տարվա երաշխիք։ Շահագործման սահմանված պայմանների պահպանման դեպքում PE-X խողովակաշարերի ծառայության ժամկետը կարող է գերազանցել 50 տարին։
Բոլոր ջրամատակարարման գծերը միացվում են տեխնիկական սենյակում տեղադրված միասնական բաշխիչ կոլեկտորին։ Ամբողջությամբ մոնտաժվում է նաև ներքին կոյուղատար համակարգը։ Կոյուղու հիմնական ելքը դուրս է բերվում շինության կառուցապատման մակերեսի սահմաններից՝ հետագայում սեպտիկ համակարգին կամ կենտրոնացված կոյուղատար ցանցին միացնելու համար։

Տան ներքին էլեկտրական ցանցերի մոնտաժման համար կիրառվում է պղնձե ջղերով ВВГнг տեսակի ուժային մալուխ, որի մեկուսիչ թաղանթը խմբային տեղադրման դեպքում չի տարածում այրումը։ Շահագործման սահմանված պայմանների պահպանման դեպքում մալուխի ծառայության ժամկետը կարող է գերազանցել 45 տարին։
Լարանցումն իրականացվում է պաշտպանիչ գոֆրացված խողովակների ներսում։ Դրանք ապահովում են մալուխների լրացուցիչ մեխանիկական պաշտպանություն, համակարգված տեղադրում և հեշտացնում հետագա տեխնիկական սպասարկումը (այս լուծումը թույլ է տալիս նաև փոխարինել մալուխները՝ նվազագույնի հասցնելով պատերի հարդարման ապամոնտաժման անհրաժեշտությունը)։
Կարկասային պատերում տեղադրվում են հատուկ մոնտաժային տուփեր՝ նախատեսված սնամեջ և թեթև կառուցվածքների համար։ Ամրացնող սեղմակների շնորհիվ դրանք հուսալիորեն ֆիքսվում են պատի մեջ՝ կանխելով վարդակների և անջատիչների շարժվելը շահագործման ընթացքում։
Էլեկտրական բոլոր գծերը կենտրոնացվում են տեխնիկական սենյակում տեղադրված գլխավոր բաշխիչ էլեկտրավահանակում։ Այն համալրվում է առաջատար արտադրողների բարձրորակ ավտոմատ անջատիչներով և պաշտպանիչ անջատման սարքերով (УЗО)։ Համակարգն ապահովում է էլեկտրական շղթաների պաշտպանությունը գերբեռնվածությունից, կարճ միացումից և հոսանքի արտահոսքից՝ բարձրացնելով տան էլեկտրական անվտանգության ընդհանուր մակարդակը։
Էլեկտրամոնտաժային աշխատանքների համար տրամադրվում է 5 տարվա երաշխիք։